Edicioni i 66-të i festivalit "Vera e Ohrit" u hap mbrëmjen e sotme me performancën e sopranos shqiptare me famë ndërkombëtare, Ermonela Jaho, e shoqëruar nga Orkestra e Operës dhe Baletit. Hapja e festivalit u shndërrua në një mbrëmje të veçantë artistike, ku zëri i saj magjepsi publikun dhe u shpërblye me duartrokitje të gjata e vlerësime nga të pranishmit. Për herë të parë në historinë e këtij festivali prestigjioz, ceremonia hapëse iu besua një artisteje shqiptare me përmasa botërore, duke shënuar një moment të rëndësishëm për kulturën shqiptare në një nga ngjarjet më të rëndësishme artistike në Maqedoninë e Veriut dhe rajon. Festivali "Vera e Ohrit", që prej dekadash mirëpret artistë të njohur nga e gjithë bota, edhe këtë vit konfirmoi misionin e tij si një urë që bashkon kultura dhe popuj përmes artit.