Kryeministri i Kosovës, Albin Kurti, priti në Prishtinë Sekretarin e Përgjithshëm të OSBE-së, Feridun Sinirlioğlu, në një takim ku u diskutua bashkëpunimi ndërmjet Kosovës dhe këtij organizmi ndërkombëtar, si dhe zhvillimet demokratike në vend. Kurti e falënderoi Sinirlioğlu për kontributin e vazhdueshëm të misionit të OSBE-së në Kosovë, duke theksuar se ai ka ndihmuar në forcimin e institucioneve demokratike, promovimin e të drejtave të njeriut dhe mbështetjen për sundimin e ligjit. "Ne jemi të bindur që stabiliteti i vërtetë arrihet nëpërmjet forcimit të institucioneve demokratike, duke siguruar të drejta të barabarta për të gjithë, duke luftuar korrupsionin dhe krimin e organizuar", u shpreh Kurti. Kryeministri nënvizoi gjithashtu se Kosova ka shënuar përparim të qëndrueshëm ekonomik, duke bërë të ditur se Bruto Produkti Vendor ka arritur në 12 miliardë euro. Ai shtoi se vendi ka avancuar edhe në sundimin e ligjit dhe sigurinë publike, duke theksuar se "vlerësimet ndërkombëtare e njohin Kosovën si një nga vendet më të sigurta në Evropë."