Nëse zhvillimi i inteligjencës artificiale dhe robotikës vazhdon me ritmet aktuale, paratë mund të humbasin një pjesë të rëndësisë së tyre brenda dekadës së ardhshme, ka deklaruar Elon Musk në një intervistë për “The Economist”. “Paratë nuk do të kenë rëndësi në vitin 2036”, u shpreh Musk, duke argumentuar se një ekonomi e mbështetur te robotët dhe inteligjenca artificiale mund të prodhojë një bollëk të tillë mallrash dhe shërbimesh, sa nevoja për sistemet tradicionale monetare të zbehet. Sipas tij, përparimi i teknologjisë do të ndikojë ndjeshëm edhe në tregun e punës. Musk parashikon një të ardhme ku njerëzit mund të kenë një standard të lartë jetese edhe pa u mbështetur domosdoshmërisht te punësimi tradicional, përmes një modeli që ai e përshkroi si “të ardhura të larta universale”. Duke folur për garën globale në inteligjencën artificiale, Musk vlerësoi gjithashtu potencialin e Kinës për të marrë një rol udhëheqës në këtë fushë, veçanërisht nëse vendi zgjeron kapacitetet e tij informatike. Ai tha se kompanitë kineze kanë bërë përparime të rëndësishme, pavarësisht burimeve më të kufizuara krahasuar me rivalët e tyre. Në të njëjtën intervistë, drejtori ekzekutiv i Tesla dhe SpaceX foli edhe për angazhimin e tij në politikën amerikane, duke pranuar se gjatë zgjedhjeve presidenciale të vitit 2024 ishte përfshirë “paksa shumë” dhe se ishte “rrëmbyer” nga dinamika politike.