Gazetari Marin Mema ka reaguar pas ceremonisë së zhvilluar në Pustec gjatë vizitës së kryeministrit të Maqedonisë së Veriut, Hristijan Mickoski, ku, sipas pamjeve dhe raportimeve mediatike, u intonua vetëm himni i Maqedonisë së Veriut. Mema e cilëson situatën të papranueshme dhe kërkon reagim nga autoritetet shqiptare. “Shteti shqiptar të reagojë!”, shkruan ai, duke shtuar se organizatorët duhet të mbajnë përgjegjësi për mënyrën se si u zhvillua ceremonia. “Si mund të pranohet diçka e tillë? Kjo është e papranueshme, është e turpshme, skandaloze!”, shprehet Mema, duke argumentuar se aktiviteti u zhvillua në territorin e Republikës së Shqipërisë. Gazetari thekson se Pusteci, pavarësisht se është një zonë ku jeton komuniteti maqedonas, ndodhet në territorin shqiptar dhe, sipas tij, kjo nuk duhet të nënkuptojë anashkalimin e simboleve shtetërore shqiptare. “Në asnjë mënyrë nuk mund të mos vendoset himni shqiptar, kur aktiviteti organizohet në territorin e Republikës së Shqipërisë”, shkruan ai. Mema e lidh këtë episod edhe me çështjen e respektimit të të drejtave dhe simbolikës shqiptare në Maqedoninë e Veriut, duke kërkuar nga institucionet shqiptare që të reagojnë dhe të tregojnë, siç shprehet ai, se “jeni shtet serioz”. Në një reagim të fortë, ai përfundon: “Boll me këto tolerime të vazhdueshme! Tregojuni zyrtarisht vendin këtij e shumë të tjerëve si ky!”