Një tërmet me magnitudë 3.9 ballë të shkallës Rihter ka goditur Shqipërinë ditën e sotme, duke u regjistruar në orën 11:28 sipas kohës lokale. Sipas të dhënave të Qendrës Sizmologjike Evropiane-Mesdhetare (EMSC), epiqendra e tërmetit ndodhej rreth 56 kilometra në juglindje të Elbasanit dhe 18 kilometra në jugperëndim të Pogradecit.

Thellësia hipoqendrore e lëkundjeve ishte 15 kilometra, çka bëri që tërmeti të ndjehej lehtë në zonat përreth, pa shkaktuar dëme materiale apo pasoja për njerëzit. Autoritetet nuk raportojnë për probleme, ndërsa aktiviteti sizmik konsiderohet i zakonshëm për këtë rajon.