Presidenti amerikan Donald Trump ka refuzuar ofertat e ndërmjetësimit nga aleatët e SHBA-ve në Lindjen e Mesme, përfshirë Omanin, për të nisur negociata për ndalimin e luftës me Iranin. Sipas burimeve iraniane, Teherani nuk do të pranojë armëpushimin derisa sulmet nga SHBA-të dhe Izraeli të ndalen, duke theksuar se çdo ndërprerje pa një garanci të tillë nuk është e pranueshme.

Ministri i Jashtëm iranian, Abbas Araghchi, mohoi raportimet se lideri suprem i ri iranian, Mojtaba Khamenei, ishte plagosur dhe e quajti “të pabaza” çdo pretendim amerikan. Ai theksoi se Irani vazhdon të mbështesë autoritetin e Mojtaba Khameneit dhe hedh poshtë spekulimet e Uashingtonit rreth shëndetit të tij.

Nga ana tjetër, sulmet e përbashkëta të SHBA-ve dhe Izraelit shkaktuan vdekjen e së paku 15 personave në një fabrikë në Isfahan, ndërsa ministri i Jashtëm turk, Hakan Fidan, paralajmëroi se kryeministri izraelit Benjamin Netanyahu mund të nisë një gjenocid të ri, duke bërë thirrje për ndërhyrje ndërkombëtare.