Një ndeshje boksi për titull botëror në Trabzon është ndërprerë mes tensioneve të forta, pasi një incident në ring u shndërrua në përleshje masive.

Ngjarja ndodhi pas raundit të tretë, kur boksieri rus Sergei Gorokov tentoi të provokonte kundërshtarin turk, çka solli reagimin e menjëhershëm të stafit të këtij të fundit. Situata u përshkallëzua me përfshirjen e anëtarëve të të dyja ekipeve, duke e kthyer ringun në skenë kaosi.

Tensionet u rritën edhe më tej kur dhjetëra tifozë zbritën nga tribunat dhe hynë në ring, duke përdorur karrige dhe sende të forta. Si pasojë, disa persona mbetën të lënduar, ndërsa përplasjet vijuan edhe jashtë hapësirës së ndeshjes.

Për shkak të situatës së pakontrolluar, organizatorët vendosën ndërprerjen e menjëhershme të ndeshjes dhe nisjen e hetimeve për të sqaruar rrethanat e incidentit.