Bekim Fazliu nga Lëvizja Arbëria ka reaguar me kritika të ashpra ndaj disa analistëve, gazetarëve dhe politikanëve nga Kosova dhe Shqipëria, duke pretenduar se shqiptarët në Maqedoninë e Veriut nuk kanë marrë mbështetjen që u nevojitet.

Sipas Fazliut, "po të na kishin përkrahur vetëm pak, sa na shajnë aq shumë, disa 'analistë' e 'gazetarë' nga Kosova e Shqipëria, por edhe disa politikanë, ne shqiptarët e Maqedonisë së Veriut moti do të ishim të lirë e të bashkuar".

Ai shtoi se "më shumë energji harxhohet në sharje, njollosje e përçarje, sesa do të duhej për një përkrahje minimale me rezultat real", ndërsa theksoi se "edhe kur na përkrahin, zakonisht përkrahin zullumqarët dhe argatët e botës serbe, e jo popullin".

Fazliu u shpreh gjithashtu se, sa herë ka pasur dilemë se kë të mbështesë, i kanë mjaftuar qëndrimet e disa analistëve për të marrë vendimin, duke shtuar se "një 'analist' që shitet njëherë, shitet çdo herë", ndërsa përfundoi me mesazhin, "Respekt për përjashtimet".