Kompania Ceacon ka ndërmarrë një nismë ekologjike nën moton “100 drunj për 100 punëtorë”, duke synuar të japë kontribut në krijimin e një mjedisi më të shëndetshëm përmes mbjelljes së drunjve në disa qytete të Maqedonisë së Veriut. Ky donacion është vlerësuar si një shembull i përgjegjësisë sociale dhe kujdesit ndaj mjedisit. Pronarja e kompanisë, Rina Sherifi, u bëri thirrje edhe kompanive të tjera që disponojnë burime dhe mundësi të ngjashme t’i bashkohen kësaj nisme. Sipas saj, mbrojtja e mjedisit duhet të jetë një kauzë e përbashkët për të gjithë, me qëllim që qytetet ku jetojmë e punojmë të bëhen më të gjelbra dhe më të shëndetshme.

Nga ana tjetër, drejtori i Ndërmarrjes Publike Komunale, Samet Bislimi, e përshëndeti këtë iniciativë, duke theksuar rëndësinë e saj për komunitetin. Ai u bëri apel qytetarëve që të tregojnë kujdes ndaj drunjve të mbjellë dhe të kontribuojnë në mirëmbajtjen dhe gjelbërimin e qytetit.